அசைவப்பூ : அசையும் காட்சிகளின் கவித்துவம்!
நேற்று முன்தினம் புலனப் பக்கத்தில் ‘அசைவப்பூ’ என்றொரு நூல் வெளிவரவிருப்பதாகக் கவிஞர் ச. நீலமேகன் குறிப்பிட்டிருந்த செய்தி மகிழ்ச்சியளித்தது.
நீலமேகன் தனியார் கல்வி நிறுவனத்தில் பேராசிரியராகப் பணியாற்றி வருபவர். நல்ல வாசிப்புப் பழக்கமும் பண்பும் கொண்ட இலக்கிய நண்பர். சென்னைப் பல்கலைக்கழகத்தில் நான் படித்த காலத்திலிருந்தே அவரைக் கவனித்து வருகிறேன். அவரது வாசிப்பும் வாழ்வும் இலக்கிய உலகில் அவருக்கான தனித்துவமான இடத்தை உருவாக்கும் என்ற நம்பிக்கை எனக்குள் எப்போதும் இருந்தது. காஞ்சிபுரம் வந்த பிறகு அவருடனான பழக்கமும் வாசிப்புப் பகிர்வும் அதிகரித்தன. நூல்கள் எழுதுவதிலும் வெளியிடுவதிலும் தயக்கம் காட்டிவந்த அவர், கடந்த ஆண்டு (2025) ‘மாய வாழ்க்கை’, ‘கொடியிலே காய்கிறது மழை’ என இரண்டு கவிதைத் தொகுப்புகளை வெளியிட்டார். அவற்றில் முதலாவது புதுக்கவிதைத் தொகுப்பு; இரண்டாவது ஹைக்கூ தொகுப்பு. அதன் தொடர்ச்சியாக நவம்பர் 2026இல் மூன்றாவது நூலாக ‘அசைவப்பூ’வை ஹைக்கூ தொகுப்பாகக் கொண்டுவந்துள்ளார். பட்டாம்பூச்சியை ஓர் அழகான ‘அசைவப்பூ’வாகக் காணும் கவித்துவப் பார்வையே இத்தலைப்பின் தனித்துவம்.
நிறைய வாசிப்பு அனுபவங்களையும் எண்ணங்களையும் கொண்டிருப்பவர்கள் படைப்புலகில் கவிதையையும், குறிப்பாக ஹைக்கூவையும் தங்களது வெளிப்பாட்டு வடிவமாகத் தேர்ந்தெடுப்பது ஓர் அழகியல் ஆச்சரியம். அப்படியானதொரு ஆச்சரியமே நீலமேகனின் ‘அசைவப்பூ’. அதை அவரே சுயவிமர்சனமாக,
“சுத்தக் கருமியாய் இருப்பானோ?
சிக்கனமாய் எழுதுகிறார்
ஹைக்கூ”
- எனப் பதிவு செய்திருப்பது வியப்பளிக்கிறது.
0
எதிர்பாராத விதமாக இன்று மாலை எனது சில நூல்களுடன் ‘அசைவப்பூ’வையும் நீலமேகன் என் துணைவியாரிடம் கொடுத்தனுப்பியிருந்தார். அவற்றை எடுத்துவைத்த கையோடு நூலை வாசிக்கத் தொடங்கினேன். அந்த வாசிப்பு அனுபவத்தில் முதலில் கவனத்தை ஈர்த்த கவிதை,
“குடலை உருவி
மாலையாகப் போடுகிறது காகம்
செத்துவிட்டது எலி”
- எனும் காட்சிக் கவிதை.
ஹைக்கூவின் அடிப்படையான காட்சிப்படுத்தல் திறனை இக்கவிதை சிறப்பாக வெளிப்படுத்துகிறது. ஜப்பானிய மரபிலிருந்து தமிழுக்கு அறிமுகமான ஹைக்கூ, மூன்று வரிகளுக்குள் செறிவான காட்சியையும் புதிய பொருள் திறப்பையும் உருவாக்கும் கவிதை வடிவம். தமிழ் ஹைக்கூ தனது மொழி, பண்பாடு, வாழ்வியல் சூழலுக்கு ஏற்பத் தனித்துவமான வெளிப்பாட்டு முறையையும் பெற்றுள்ளது. வாசித்த நொடியிலேயே மனக்கண்ணில் காட்சியை விரித்துவிடுவது அதன் முக்கியமான பண்பு. அந்த வகையில், செத்த எலியின் குடலைக் காகம் உருவி மாலையாகப் போடும் அதிர்ச்சியூட்டும் காட்சியைப் புலனுணர்வுப் படிமத்துடன் நம் கண்முன் நிறுத்தும் இக்கவிதை மிகச் சிறந்த ஹைக்கூவாகிறது.
அதேபோல,
“கைவிட்ட கவிஞன் யார்?
கிணற்றில் விழுந்த
நிலவு”
0
“மௌனமாய்ப் பிச்சைக்காரன்
பாத்திரத்தில் பேசுகின்றன
சில்லறைகள்”
0
“அந்தரத்தில் பறக்கிறது
கொக்கின் அலகில்
மீன்”
0
“அலையைக் கரைசேர்த்துவிட்டு
குளத்தில் மூழ்கிவிடுகிறது
கல்”
- எனும் கவிதைகள் இயற்கையின் இயக்கங்களையும் அழகியலையும் நுட்பமாக வெளிப்படுத்துகின்றன. குறிப்பாக, கல் குறித்த கவிதையை,
“அலைகள் கரைசேர
குளத்தில் மூழ்கும்
கல்”
- என நிகழ்கால இயக்கத்தில் அமைத்துப் பார்க்கலாம் என்று தோன்றுகிறது. இத்தகைய சொல் மாற்றங்கள் ஹைக்கூவின் காட்சித் தன்மையிலும் கால உணர்விலும் ஏற்படுத்தும் தாக்கம் கவனிக்கத்தக்கது.
0
மொத்தம் 192 ஹைக்கூ கவிதைகளைக் கொண்ட இத்தொகுப்பின் பாடுபொருள்களை இயற்கை, வாழ்வியல் கவனிப்புகள், பணிச்சூழல், அரசியல் அங்கதம், தனித்துவமான பார்வை எனப் பகுத்துப் பார்க்க முடிகிறது.
வாழ்வியல் கவனிப்புகளுக்குச் சான்றாக,
“காணாமல்போன
ஏரியைக் கண்டுபிடித்தது
கனமழை”
0
“சோற்று வற்றல்
காக்கை விரட்டக் காவலிருக்கும்
கரித்துணி”
0
“நீண்டகழுத்து கண்ணாடிமேனி
அழகாய் இருந்தென்ன
மதுப்புட்டி”
- எனும் கவிதைகள் அமைந்துள்ளன. நாம் அன்றாடம் கடந்து செல்லும் காட்சிகளைக் கவிதையாக்குவதில் கவிஞரின் கூரிய கவனிப்புப் பார்வை வெளிப்படுகிறது. அதேபோல,
“அவசரம் எதுவானால் என்ன?
எப்போதும் ஒரே வேகம் தான்
கடிகாரம்”
0
“கன்னத்திலிருந்தும் கடிக்கிறது
இங்கிதம் தெரியாத
கொசு”
0
“கடன்கட்ட வழியில்லை
வீட்டில் வலை பின்னும்
பொறுப்பற்ற சிலந்தி”
- எனும் கவிதைகள் அன்றாட வாழ்வின் நகைச்சுவை, எரிச்சல், பொருளாதாரப் போராட்டம் ஆகியவற்றை முரண் உத்தியுடன் வெளிப்படுத்துகின்றன. குறிப்பாக, கடனைத் திருப்பிச் செலுத்த வழியின்றித் தவிக்கும் மனிதனின் மனநிலையை, தொடர்ந்து வலை பின்னும் சிலந்தியுடன் ஒப்பிடும் மூன்றாவது கவிதை தனித்துவமான அழகியல் கொண்டது. மேலும்,
“இரங்கல் கூட்டம்
செல்போன் ஒலிக்கிறது
என்ன சத்தமிந்த நேரம்”
- என்னும் கவிதை துக்கச் சூழலில்கூட நவீனத் தொழில்நுட்பம் குறுக்கிடும் சமகால மனித வாழ்வின் முரண்பாட்டை இயல்பாகப் பதிவு செய்கிறது.
0
அடுத்ததாக, கவிஞரின் ஆசிரியர் பணிச்சூழல் அனுபவங்களும் சில கவிதைகளில் வெளிப்படுகின்றன.
“சுண்ணாம்புச் சத்தில்லையோ!
விழுந்ததும் உடைந்துவிட்டது
சாக்பீஸ்”
- என்ற கவிதை அவரது பணிச்சூழலையும்,
“முன்னும் பின்னும் கிழிந்தபத்து
பள்ளிப் புத்தகத்தில்
பதிற்றுப்பத்து”
- என்ற கவிதை அவரது தமிழாசிரியர் அடையாளத்தையும் வெளிப்படுத்துகின்றன. அதேபோல, இன்றைய கல்விச் சூழலில் மாணவர்களின் நிலைக் குறித்த கவலையை,
“கேள்வி கேட்ட ஆசிரியர்
விடை தேடுகிறார்
பரிட்சைப் பேப்பரில்”
- என்ற கவிதை வழியாக கவிஞர் வெளிப்படுத்துகிறார். கற்பித்தல், கற்றல் ஆகியவற்றின் முரண்பாடுகளைச் சிந்திக்கத் தூண்டும் பதிவு இது.
0
கவிஞர் நீலமேகன் இந்நூலுக்கு அணிந்துரையைப் புதுவை சீனு.தமிழ்மணியிடம் பெற்றுள்ளார். துளிப்பாக்களின் வழியாக அடர்த்தியான அரசியல் அங்கதங்களைப் படைத்த தோழவர். அவ்வகையில், இத்தொகுப்பிலும் அரசியலை மையப்படுத்திய ஹைக்கூ கவிதைகளும் இடம்பெற்றுள்ளன.
“தாலிக்குத் தங்கமிருக்கட்டும்
முதலில்
மாப்பிள்ளை?”
0
“வேட்டிக்கு மனு கொடுத்தால்
கோவணம்தான் கிடைக்கிறது
அரசுத் திட்டம்”
0
“ஒழுங்காக வேலை செய்திருக்கலாம்
கைநீட்டி வாங்குகிற
லஞ்சத்திற்காவது”
- எனும் கவிதைகள் குறிப்பிடத்தக்க அரசியல் அங்கதங்களாகின்றன. தாலி வாங்கித் தரவும் பல உறவுகள் முன்வரும் நிலையில், மணமக்களுக்கான பொருத்தமான இணையைத் தேடித்தர யாரும் முன்வருவதில்லை என்ற சமூக முரணை முதல் கவிதை சுட்டுகிறது.
ஆட்சிகள் மாறினாலும் அரசுத் திட்டங்களின் அவலநிலை மாறுவதில்லை என்பதையும், லஞ்சம் வாங்கியும் பணிகளைச் செய்து முடிக்காத அரசு அலுவலகப் போக்கையும் மற்ற கவிதைகள் அங்கதத்துடன் விமர்சிக்கின்றன.
0
பொதுவாக ஒவ்வொரு படைப்பாளியிடமும் ஒரு தனித்துவம் இருக்கும். அதைக் கண்டறிவதில்தான் வாசகனின் தேடலும் படைப்பாளியின் படைப்பாற்றலும் இணையும். அந்த வகையில்,
“உண்டு முடித்ததும்
கழுவிலேற்றினார்கள்
ஓட்டல் ரசீது”
0
“இருக்கும்போது பல்லிக்கு எறும்பு
இறந்தபிறகு எறும்புக்குப் பல்லி
இயற்கை ஒப்பந்தம்”
- எனும் கவிதைகளில் வரலாற்றுச் சான்றையும் தத்துவார்த்தக் கருத்தியலையும் கச்சிதமாகக் கவிதையாக்கியிருப்பது நீலமேகனின் தனித்துவத்தை வெளிப்படுத்துகிறது.
அதேவேளையில்,
“மூலதனம் இருந்தும்
முதலாளியாகவில்லை
கம்யூனிஸ்ட்”
- என்ற கவிதையில் பொருளாழம், அழகியல், அனுபவம் என விரிந்த கவித்துவம் சொல் விளையாட்டுக்குள் சுருங்கிவிட்டதோ என்ற எண்ணம் எழுகிறது. முரண் உத்தியைப் பல இடங்களில் சிறப்பாகக் கையாண்ட கவிஞர், இக்கவிதையில் முன்வைத்திருக்கும் முரண் உடன்பாடற்ற நிலையில் கருத்தாழத்தைக் காட்டிலும் சொல் விளையாட்டுக்கு முன்னிலைப்படுவதாகத் தோன்றுகிறது.
அதேபோல, சில கவிதைகள் ஏற்கெனவே பலராலும் பாடப்பட்ட பொருள்களைச் சில சொற்கள் மாற்றியமைக்கப்பட்ட நிலையில் மீண்டும் முன்வைப்பதாகத் தெரிகிறது.
“தேர்வுத்தாளில்
விடைதேடும்
ஆசிரியன்”
0
“விளைநிலம் விற்று
வீட்டுமனை வாங்கினான்
அதே நிலம்தான்”
0
“இருளில் நான்மட்டும்
தனியே ரசிக்கிறேன்
சுடரின் நடனம்”
0
“இலக்கியக் கூட்டம்
நன்றியுரையாற்றினார்
நாற்காலிகளுக்கு”
- என்பன அவற்றில் சில. பொதுவான உணர்வுகள் பல படைப்பாளர்களிடமும் ஒரே மாதிரியான வெளிப்பாட்டை உருவாக்குவது இயல்புதான். இருப்பினும், பழக்கப்பட்ட கவிமொழியிலிருந்து விலகித் தனித்துவமான படிமங்களைக் கண்டடைவதில் படைப்பாளர் நீலமேகன் கூடுதல் கவனம் செலுத்த வேண்டியுள்ளதையும் இதன்வழி தெரிவிக்க விரும்புகிறேன்.
0
இந்நூலை கவிஞரின் நண்பர் பெ.சக்திவேல் ‘தூரிகை தீண்டாத ஓவியங்கள்’ என்னும் தலைப்பில் வாழ்த்தியுள்ளார். 64 பக்கங்களைக் கொண்ட இத்தொகுப்பு, வாசிப்பு அனுபவமும் இலக்கிய ஆர்வமும் கொண்ட படைப்பாளியாக நீலமேகனை மீண்டும் வெளிச்சமிட்டுக் காட்டுகிறது.
அட்டை வடிவமைப்பு, பின்பக்கத்தில் இடம்பெற்றுள்ள தேர்ந்தெடுக்கப்பட்ட கவிதைகள், சுருக்கமான என்னுரை, கவிதைகளுக்கான வாசிப்பு இடைவெளியுடன் அமைந்த அச்சுக்கோப்பு என ‘வேணு’ பதிப்பகம் நூலை அழகுறப் பதிப்பித்திருப்பது சிறப்பு.
0
எனக்குத் தெரிந்த மட்டும் ச.நீலமேகன் நல்ல கதை வாசிப்பும் கதை எழுதும் ஆற்றலும் மிக்கவர். அவரது வாசிப்பு அனுபவமும் சமூகக் கவனிப்பும் மொழியைக் கையாளும் திறனும் பல கவிதைகளில் வெளிப்படுகின்றன. எளிய காட்சிகளுக்குள் ஆழமான பொருளைத் தேடுவதும், வாழ்வின் முரண்பாடுகளைச் சொற்சிக்கனத்துடன் வெளிப்படுத்துவதும் அவரது படைப்புலகின் குறிப்பிடத்தக்க பண்புகள். அதேவேளையில், பழக்கப்பட்ட கவிமொழியையும் கருத்தாழமற்ற சொல் விளையாட்டையும் கடந்து இன்னும் புதிய படைப்புத் தேடல்களை அவர் முன்னெடுக்க வேண்டும்.
அவரிடமிருந்து அடுத்தடுத்த காலங்களில் ஆழமான கவிதைகளுடன் சிறுகதைகளையும் எதிர்பார்க்கிறேன். அதற்காகத் தனது நேரத்தைப் படைப்பின் பக்கம் கூடுதலாகப் பகிர்ந்தளித்து, தொடர்ந்து எழுதவும் வெளிப்படவும் விரும்பும் ஓர் இலக்கிய வாசகனாக அவரை வாழ்த்துகிறேன்.
ஒரு பட்டாம்பூச்சியின் சிறகசைவில் மலரைக் காண்பதும், மலரின் அசைவில் பட்டாம்பூச்சியை உணர்வதும் கவிதையின் தனித்துவமான அனுபவம். அந்த அனுபவத்தைத் தனது ஹைக்கூ கவிதைகளின் வழியாக வாசகனுக்குக் கடத்த முயன்றிருக்கும் நீலமேகனின் ‘அசைவப்பூ’, அவரது படைப்புலகப் பயணத்தில் மற்றுமொரு முக்கியமான தடமாக அமைகிறது.
வாசிப்பும் விமர்சனமும் தொடரட்டும்
படைப்பின் அசைவில் இன்னும் பல பூக்கள் மலரட்டும்!
19-11-2026
என்றும் அன்புடன்,
மைத்திரி அன்பு, காஞ்சிபுரம்.
அசைவப்பூ
- ச.நீலமேகன்
வேணு பதிப்பகம்
429, மேற்கு ராஜவீதி,
நெடுங்குணம் – 606 807.
பக்கங்கள் : 64
விலை : ரூ.60/-
பேச : 94457 46308
.png)
.png)