ஞானி

இலை உதிர்ந்த

மரத்தடியில்

நிழலின் சருகுகள்...

அவை சலசலக்கும்

ஓசை கேட்டு

கண்விழிக்கிறான்

ஞானி.

- நீலமேகன்.

ஹைக்கூ

பங்காளிச் சண்டை

நீரின்றிச் சாகும்

நட்ட பயிர்

- நீலமேகன்

சாகும் காலம்

ஆரிப்போன

அந்திம வாழ்க்கைக்கு

சூடான சுண்டல்விற்று

உயிர்ச்சுடர் ஏற்றுகிறாள்

யாருமற்ற கிழவி ….

 

“சாகிற காலத்தில

இதெல்லாம் வாழ்ந்து

என்ன செய்யப்போகிறது…"

எனும் சாகாதவர்களின்

சொல் கேட்டு

 

ஒவ்வொரு நாளும்

சுடர் அணைக்கக்

காத்திருந்த காலத்தின்

குழவி நாணும்

பின்பு

நொடிநொடியாய்ச்

சாகும்.

 

- நீலமேகன்.

பிரேதப் பரிசோதனை

எறும்புகள்கூடிச் செய்யும்

பிரேதப் பரிசோதனை

எப்படி இறந்திருக்கும் தும்பி?

- நீலமேகன்.

படுகளம்

மண்புழுக்கள்

வரப்பை வெட்டும் 

ஆதிக்கக்காரன்

அதட்டும் வள்ளலார்

பாவம் மண்புழுக்கள்.

- நீலமேகன்.

ஹைக்கூ

பாரத்தைப் போட்ட பக்தன்

ஆபத்தில் அழைக்கிறான்

சீக்கிரம் வா கடவுளே!

- நீலமேகன்.

ஹைக்கூ

தெருக்குழாயடி

தண்ணீர் நின்றபின் கேட்கிறது

குருவிகளின் பாடல் 

- நீலமேகன்

வாழ்தலும் வாழ்தல் நிமித்தமும்

வாழ்தலும் வாழ்தல் நிமித்தமும்

கழுத்தோ

காலோ

சடையோ

இடையோ

அஞ்சி நடுங்கி

அலங்கரிக்கும் பாம்பு

சிவனைத் துதிபாடும்

கடவுள்

அயர்ந்த வேளையில்

ஆளை மிரட்ட

அது

ஜதிபோடும்

ஒண்டவந்த

கழுத்தை இறுக்கி

மெல்ல 

உரு மாறும்

பின்பு சிவனாகும்

• நீலமேகன்

ஹைக்கூ

பொறுக்கிய  நோட்டீசில்

கணக்குப்போடும் பள்ளிச் சிறுவன்

எந்த கட்சி ஜெயிக்கும்?

- நீலமேகன்.

ஹைக்கூ

இரவு விருந்து

உண்டு எஞ்சியதோ!

துண்டு நிலா 

- நீலமேகன்

ஹைக்கூ

தேங்கிய மழைநீரில்

முகம் பார்க்கிறது

அழுத வானம்

     - ச. நீலமேகன்